We pyńdziałek, 15 września, na Ślōnskim Uniwerzytecie we budōnku spinPLACE (ul. Bankowa 5, 40-007 Katowice) po piyrszy roz bydōm rozdane adesty skōńczynio Podyplōmowyj Sztudyje: Regiōn – Jynzyk i Kultura.
Ta sztudyjo dowo uczestnikōm potrzebno wiedza i kōmpetyncyje do realizacyje programu jynzykowyj regijōnalnyj edukacyje. Rychtujōm uczestnikōw sztudyje do kludzynio zajyńć z ślōnskigo jynzyka i ô ślōnskim jynzyku, dowajōm umiyjyntność klarowanio jynzykowych zjawisk (wyrzekaniowych, gramatycznych i leksykalnych) karakterystycznych dlo ślōnskigo jynzyka, jak tyż skazowanio zdrzōdoł zapożyczyń we ślōnskim jynzyku. Sztudyjo bilduje do przijyńcio role lidera regiōnalnyj jynzykowyj, literackij i kulturowyj edukacyje.
Na kōniec nauki sztudyńcio przeszli bez egzam ze ślōnskigo jynzyka co go społym stworzili Ślōnski Uniwerzytet, Rada Ślōnskigo Jynzyka i Pro Loquela Silesiana. We pyńdziałkowym jublu bydōm rozdane adesty skōńczynio sztudyje i certyfikaty znanio ślōnskigo jynzyka.