Miyło nōm roznajmić, że Rada Ślōnskigo Jynzyka patrōnuje spektaklowi „Tkŏcze”, co bydzie mioł prymiera we piōntek, 14 lutego, na Srogij Binie ôd Ślōnskigo Tyjatru we Katowicach.
Wyzyskowani wykorzistowani ôd władze, ze jynzykym niy do spokopiynio do inkszych, zawarci we lokalnyj miyndzypokolyniowyj spōlnocie – dźwigajōm gowy, by upōmnieć sie ô reszpekt do tego, fto ôni sōm. Gotowi wywołać rewolucyjo, jeźli ftoś wyciōngnie rynce po to, z czego skłodo sie jejich tożsamość.
W połowie XIX stolecio iste wydarzynie z regiōnu Sowich Gōr strzōnsło Europōm, a jego medialny ôbroz stoł sie symbolicznym zdrzōdłym niyskorniyjszyj Wiosny Ludōw. Gyszichta bōntu ślōnskich tkoczōw, co fołdrowali poprawa warōnkōw życio, ôna było inspiracyjo do noblisty Gerharta Hauptmanna. Jego dramat czytany z dzisiyjszyj perspektywy to je niy ino historyjo ôparto na faktach, ale przede wszyskim ôbroz walki ô uznanie i włosno godność.
Na tyn tytuł we Ślōnskim Tyjatrze czekali 70 lot! Na podzim 1954 roku na jejich binie zaczły sie prōby do przedstawiynio „Tkacze” w przekładzie Wilhelma Szewczyka. Polsko praprymiera, planowano na piyrsze miesiōnce 1955 roku, niy doszła ale do skutku – jeji realizacyjo była strzimano. Dzisiej dzieło ôd noblisty spōmino Maja Kleczewska, jedna z nojważniyjszych polskich reżyserek, publiczności ôd Tyjatru wybornie znano z takich tytułōw jak „Pod presją” abo „Łaskawe”. Na potrzeby tyj realizacyje siōngo po nowy, ślōnski przekłod tekstu ôd Hauptmanna autorstwa Mirosława Syniawy.
Bilety na spektakl we cynie ôd 40 do 80 zł idzie kupić sam: https://teatrslaski.art.pl/repertuar/tkocze/
15 lutego, przed spektaklym bydzie szło tyż posuchać dyskusyje ô tym, jeźli Polska je przijazno do myńszych jynzykōw. Debata zacznie sie ô 17:00, a ôzprawiać bydōm:
prof. Nicole Dołowy-Rybińska – kulturoznowczyni, socjolingwistka, Polsko Akadymijo Nauk
Magdalena Chowaniec – socyjolingwistka, Ślōnski Uniwerzytet
Grzegorz Kulik – tumacz, przewodniczōncy Rady Ślōnskigo Jynzyka
dr Tymoteusz Król – etnolog, folklorysta, Polsko Akadymijo Nauk
dr Anna Wotlińska – dyrechtorka Instytutu Jynzykowyj Rozmajtości Republiki
Debata pokludzi Marcin Musiał.
Bilety we cynie 5 zł idzie kupić sam: https://teatrslaski.art.pl/repertuar/debaty-w-tyjatrze-czy-polska-jest-przyjazna-dla-jezykow-mniejszych-uniwersytet-latajacy-slask/
Fotografije: Przemysław Jendroska